މިފަހަރުގެ ލިޔުންކޮޅު އަމާޒުކޮށްލެވިފައި މިވަނީ ދިވެހިރާއްޖޭގެ ގައުމީ މަންހަޖުގެ ތަންފީޒު ކުރުމަށް ބޭނުންތެރި ކިޔަވައިދިނުމުގެ ގޮތަކާބެހޭގޮތުންނެވެ. އެއީ ތީމް ބޭނުންކޮށްގެން ކިޔަވައިދިނުމާ ގުޅޭގޮތުންނެވެ. އިގިރޭސިބަހުގައި ތީމް ބޭނުންކުރަނީ ބައިވަރު ބައިތަކެއް އެއްކޮށްލެވި ގުޅުވާލެވިފައިވާ އެކައްޗެއްގޮތަށް ވަކި އަމާޒެއް ކަނޑައަޅައިގެން ކަމެއް ކުރުމަށެވެ. މިސާލަކަށް ޢާއްމު ދިރިއުޅުމުގައިވެސް، ހަފުލާއެއްގައި ހުރިހާކަމެއް އެއްތީމަކަށް ގުޅުވައިގެން ރާވާލެވޭއިރު، މުޅިހަފުލާގެ ހުރިހާ ރަސްމިއްޔާތުތައް އެއްޚިޔާލަކާއި ގުޅުވައިގެން ކުރިޔަށް ގެންދެވެއެވެ. މިގޮތުން އެއީ ވަކި ތީމަކަށް ރޭވިފައިވާ ހަފުލާއެކޭ ބުނެވިދާނެއެވެ. މިސާލަކަށް ދިވެހި ސަގާފަތް ތީމެއް ގޮތުގައި އިޚްތިޔާރު ކުރާނަމަ، ސަގާފީ ހެދުން، ސަގާފީ ކާނާ، ސާގާފީ ކުލަތައް، ސަގާފީ މިޔުޒިކް، އަދި މިނޫންވެސް މުޅި ހަފުލާގެ ހުރިހާ ކަމެއް އެއް ޚިޔާލަކާއި ގުޅުވައިގެން ކަންކަން ރޭވެއެވެ. އެންމެ ތިލަކޮށް މާނަކުރާނަމަ ތީމެއް ބޭނުން ކުރުމަކީ ތަފާތު ބައިތަކެއް އެއްކޮށްލައިގެން އެކައްޗެއް ގޮތަށް ގުޅުވާލުމެވެ. ގައުމީ މަންހަޖުގައިވާ މުހިއްމު ގާބިލިއްޔަތުތައް ޚާއްޞަކޮށް ގުޅިގެންދަނީ މިބާވަތުގެ ކިޔަވައިދިނުމުގެ ގޮތްތަކާއެވެ. ދަރިވަރުންގެ އުނގެނުން ވާންޖެހޭނީ ދެމެހެއްޓެނިވި ތަރައްގީއަށް އެހީތެރިވެދޭ ގޮތަށް ކިޔަވައިދިނުން ރޭވޭ ގޮތްތަކަކަށެވެ. މާނައަކީ ތަފާތު މާއްދާތަކުގެ މުގައްރަރުގެ ބައިތަކެއް ވަކި ވަކި ކޮށްލެވިފައި އޮތްނަމަވެސް ސިކުނޑީގައި އުނގެނުން ހިނގަނީ ކޮންމެ މާއްދާއެއްގައި ހުންނަ ބައިތައް ވަކިވަކިން ނޫން ކަމެވެ. ހަމަ މިގޮތަށް ދަރިވަރުންނަށް އެނގޭ މަޢުލޫމާތެއް ދިރިއުޅުމުގައި ބޭނުންކުރާއިރު އެކަން ކުރެވެނީވެސް ކޮންމެ މާއްދާއެއްގައި ކިޔަވާ އެއްޗެއް ވަކިވަކިންނެއް ނޫނެވެ. މިބީދައިން ވިސްނާއިރު، އުނގެނުމަކީ ކިތަންމެ ތަފާތު ނަންތަކެއް ދެވިފައިވާ މާއްދާތަކެއް ހިމެނޭ ކަމެއް ނަމަވެސް އެއީ ގުޅި ލާމެހިގެން ސިކުނޑީގައި ހިނގާ ކަމެކެވެ. ތީމް ބޭނުންކޮށްގެން ކިޔަވައިދިނުމަކީ ދިވެހިރާއްޖޭގެ ސްކޫލުތަކުގައި އެހާ ޢާއްމުކޮށް ފެންނަ ކަމެއް ނޫނެވެ. މިއަދުގެ ލިޔުންކޮޅުގައި މި ބަލާލާނީ ތީމް-ބޭސްޑް ލާރނިން/ޓީޗިން ނުވަތަ ތީމް ބޭނުންކޮށްގެން ކިޔަވާދިނުމުގެ ޢިލުމީ ވިސްނުމަށާއި އެގޮތް ބޭނުންކޮށްގެން ކިޔަވައިދިނުމުގައި ގެންގުޅެވިދާނެ ބައެއް އުކުޅުތަކާއި އަދި ސަމާލުވެވިދާނެ ކަންކަމަށެވެ.
ތީމް-ބޭސްޑް ޓީޗިން ނުވަތަ ތީމް ބޭނުންކޮށްގެން ކިޔަވައިދިނުމުގެ ޢިލުމީ ވިސްނުން
ސިކުނޑީގެ ޚާއްޞަ ދިރާސާވެރިން ހާމަކުރައްވާގޮތުގައި، އުނގެނުން ހިނގަނީ ބައިވަރު ކަންތައްތަކެއް ގުޅި ލާމެހިގެން ސިކުނޑީގެ ތަފާތު ބައިތަކުގެ މަސައްކަތްތަކުގެ ތެރެއިން އެއެ ކަމެއް ގޮތުގައެވެ(ވިސްލީ އަދި ހޮޝް، 2002). މިބޭފުޅުން އިޝާރާތްކުރައްވާގޮތުގައި ކިޔަވައިދިނުން ރޭވެން ޖެހޭނީ މުޅި ސިކުނޑިއަށް އަމާޒުކޮށްގެންނެވެ. މާނައަކީ، ސިކުނޑީގައި ކަންހިނގާގޮތަށް ބަލާއިރު ވިސްނުން (ތިންކިން)، ވަކިވަކި އިހުސާސްތައް ކުރެވުން (ފީލިންސް) އަދި ހަށިގަޑުގެ ތަފާތު ހަރަކާތްތަކުގެ (މޫވްމެންޓްސް) މަސައްކަތް ޚާއްޞަކުރެވެނީ ސިކުނޑީގެ އެކި ބައިތަކަށް ކަމުގައި ވީ ނަމަވެސް ކޮންމެކަމެއް ހިނގަނީ ވަކިވަކިންނެއް ނޫނެވެ. މިސާލަކަށް ވިސްނުން ހިނގާގޮތަށް ބަލާއިރު، ކުރެވޭ ހަރަކާތްތަކާއި، އަދި އެއާގުޅޭ ގޮތުން ހިނގާ ޚިޔާލުތައް އެވިސްނުމުގައި އިސްދައުރެއް އަދާ ކުރެއެވެ. ހަމަ މީބަދައިން ކަމަކާއި ގުޅޭ އިހުސާސްތަކެއް ކުރެވޭއިރު، ހިނގާ ޚިޔާލުތަކާއި ކުރެވޭ ހަރަކާތްތައްވެސް ވަރަށް ބޮޑަށް ގުޅިގެންދެއެވެ. މީގެ މާނައަކީ ސިކުނޑީގެ ކަންކަން ހިނގަނީ އެއްބައި އަނެއްބައިގެ މަސައްކަތްތައް ވަރަށް ބޮޑަށް ގުޅި ލާމެހިގެން ކަމެވެ. ތީމް ބޭނުންކޮށްގެން ކިޔަވާދިނުމުގެ ޚިޔާލަކީ މިވިސްނުމުގެ ތެރެއިން ވުޖޫދުވީ ކިޔަވައިދިނުމުގެ ފިލޯސަފީ އެކެވެ. މިގޮތުން އެންމެ ބޮޑަށް ފާހަގަކޮށްލެވެނީ، ތީމް ބޭނުންކޮށްގެން ކިޔަވައިދިނުމަކީ ދަރިވަރުންގެ ޢާއްމު ދިރިއުޅުމާއި ގުޅޭ މާނަހުރިކަންތަކެއް ހިމަނައިގެން ކިޔަވާ މާއްދާތަކުގެ ތަފާތު ބައިތައް އެއްކޮށްލައިގެން ކިޔަވައިދިނުން ރޭވޭ ގޮތެއް ކަމެވެ. މިގޮތަށް ކިޔަވައިދޭ އިރު މާއްދާތަކުގައި އެކުލެވޭ ބައިތައް (ކޮންޓެންޓް) ކިޔަވައިދޭނީ ވަކިވަކިންނެއް ނޫނެވެ. އެއާއި ޚިލާފަށް އެއްކޮށްލައިގެން އެއްތީމެއްގެ ތެރެއިން ބައިތައް ގުޅުވައިލައިގެންނެވެ. ތީމް ބޭނުންކޮށްގެން ކިޔަވާދޭއިރު އެންމެ ޢާއްމުކޮށް ބޭނުންކުރާ ކިޔަވައިދިނުމުގެ ގޮތްތަކަކީ ޕްރޮޖެކްޓް ބޭނުންކުރުން، ޕްރޮބްލެމެއް (މައްސަލައެއް) ގޮތަށް، އިންކުއަރީ ގޮތްތައް އަދ މިނޫނަސް އިންޓިގްރޭޓެޑް ޓީޗިން ފަދަ ގޮތްތަކެވެ. މި ކިޔަވައިދިނުމުގެ ގޮތްތަކުގައި އެކުލެވޭ އެންމެ މުހިންމު ސިފަތަކަކީ ދަރިވަރުންގެ އުގެނުން ދެމެހެއްޓެނިވި އަދި ވަށައިޖެހޭ ގޮތަށް، މާނަހުރި ކަންތައްތަކެއްގެ ތެރެއިން ދަރިވަރުންގެ ރޯލް އިސްކޮށް ކިޔަވައިދިނުން ރޭވުމެވެ.
އިސްވެދިޔަ ގޮތަށް ކިޔަވައިދިނުން ރޭވުމަށް އިރުޝާދު ދެއްވަމުން، ކެނެޑާގެ މަޝްހޫރު ކިޔަވައިދިނުމުގެ ތަޖުރިބާކާރެއް ކަމަށްވާ ޑަޔާނާ މުމްފޯރޑް (2000) ހާމަކުރައްވަނީ ތީމަކީ ކިޔަވައިދިނުމަށް ބޭނުންކުރެވޭ މުހިންމު ވެހިކަލެއް ކަމެވެ. މިބައި އިތުރަށް ތަފުސީލު ކުރައްވަމުން ފާހަގަކުރައްވަނީ ކިޔަވައިދިނުން ރާވާއިރު ތީމެއް ބޭނުން ކުރުމުން ދަރިވަރުން އުނގެނެން ޖެހޭ ބައިތަކާއި، ތަރައްގީ ކުރަންޖެހޭ ހުނަރުތަކާއި، ލިބިގަންނަން ޖެހޭ ސިފަތަކާއި، އަދި ދަރިވަރުންގެ ކިބައިގައި އަށަގަންނަވަންޖެހޭ އިހުސާސްތަކާއި އެތަށް ކަމަކަށް އަމާޒުކޮށްގެން ކިޔަވައިދިނުން ރޭވޭކަމެވެ(މުމްފޯރޑް، 2000). މީގެ އިތުރުން ތީމް ބޭނުންކޮށްގެން ކިޔަވައިދިނުމަކީ ދަރިވަރުންގެ ތަޖުރިބާތަކާއި އިހުސާސްތަކާއި، ޝައުގުވެރިވާ ކަންކަމާއި ދިރިއުޅުމުގެ ތަފާތު ކަންތައްތަކާއި ފަސޭހައިން ގުޅުވައިލައިގެން ގެންދެވޭ އެކުދިންނަށް މާނަ ހުރި ގިނަ ބާވަތެއްގެ ހަރަކާތްތައް ހިމަނައިގެން ކިޔަވައިދިނުން ރާވާ ގޮތެކެވެ(ކެމެރަން، 2001). މި ޚިޔާލުތަކަށް ވިސްނާލާއިރު ދޭހަވެގެންދަނީ، ތީމް ބޭނުންކޮށްގެން ކިޔަވައިދިނުން ރޭވުމަކީ ދަރިވަރުންނަށް ނުހަނު ބޭނުންތެރި ގޮތެއްކަމެވެ. އޭގެ ސަބަބުން ދަރިވަރުންގެ ބައިވެރިވުން އިތުރު ކުރެވި، އުނގެނުމަކީ ހަރަކާތްތެރި އަދި ޝައުގުވެރި ކަމަކަށް ބަދަލުކޮށްލެވިދާނެ ކަމެވެ. މިގޮތުން ތީމެއްގެ މައްޗަށް ބިނާކޮށްގެން ފިލާވަޅު ގެންދާއިރު، އެތީމް ގުޅިގެންދަނީ ކިޔަވައިދޭ ހުރިހާ މަޢުލޫމާތުތަކާއި ހުނަރުތަކާއި ސިފަތަކާވެސް މެއެވެ. މިހެންކަމުން ދަރިވަރުން މަޢުލޫމާތެއް ހަދާންކުރަން، ނުވަތަ ކަމެއް ކުރާގޮތް ވިސްނާއިރުވެސް ހިތަށް ގެނެވޭނީ އެބައިތަކެއްގައި ގުޅުވާލެވިފައިވީ ތީމެވެ. މިގޮތުން، ތީމަކީ އުނގެނުމުގެ ވެހިކަލެއް ކަމުގައި މުމްފޯރޑް (2000) އިޝާރާތްކުރައްވަނީ މިމާނައާއި ގުޅުވައިގެންނެވެ. ތީމް ބޭނުންކޮށްގެން ކިޔަވައިދޭއިރު ސަމާލުވާންޖެހޭ އެންމެ މުހިއްމު ނުކުތާތައަކީ ކިޔަވައިދިނުމުގައި ބޭނުންކުރާ ހުރިހާ ރިސޯސްތައް/މެޓީރިއަލް، އުނގެނުމުގެ ހަރަކާތްތައް، ގޯލްތައް/މަގުސަދުތައް، އަދި ވަޒަންކުރުމުގެ ގޮތްތައް ވާނީ ހުރިހާ މާއްދާތަކެއްގެ އެއްބައި އަނެއް ބައި ގުޅުވާލެވިފައެވެ. ވަކި މާއްދާއަކަށް ވަކި ގޯލެއް ނުވަތަ ވަޒަންކުރުމުގެ ވަކި ގޮތެއް ކަނޑައެޅިފައި އޮންނަން ވެސް ނުޖެހެއެވެ. އަޅުގަޑުމެންގެ ސްކޫލުތަކުގައި ވަރަށް ބޮޑަށް ފާހަގަ ކުރެވެނީ ތީމް ބޭނުންކޮށްގެން ކިޔަވައިދޭއިރުވެސް މިދެންނެވި އެއްކޮލެވޭ އެއްކޮށްލުން މާނަކުރެވޭ ގޮތް ތަފާތު ކޮށެވެ. ކޮންމެ މާއްދާއެއްގައި ވަކިން ގޯލު/މަގުސަދު ހަދާ އެކަން ހާސިލުވޭތޯ ބެލުމަކީ އެންމެ ބޮޑަށް މުދައްރިސު ސަމާލުވާކަންތައް ކަމުގައި ފާހަގަ ކުރެވެއެވެ. އެއާއި ޚިލާފަށް ބަލަންވީ މައިގަޑު ހުނަރުތަކާއި، ހަރުލައްވަންޖެހޭ ސިފަތަކާއި، އެނގެންޖެހޭ މަޢުލޫމާތުތައް އެކީ އެކައްޗަކަށް ދަރިވަރަށް ގުޅުވާލެވި އެނގިފައިވާ މިންވަރަށެވެ.
ތީމް ބޭނުންކޮށްގެން ކިޔަވައިދިނުމަށް ތައްޔާރުވުން
ތީމް ބޭނުންކޮށްގެން ކިޔަވައިދިނުމަކީ ވަކި މަރުހަލާއަކަށް ޚާއްޞަކޮށް ކިޔަވައިދޭއިރު ބޭނުންކުރާ ގޮތެއް ނޫނެވެ. ކޮންމެ މަރުހަލާއަކަށް ކިޔަވައިދޭން ރޭވި ނަމަވެސް ދުރާލައި ތައްޔާރުވުމަކީ މިގޮތަށް ކިޔަވައިދިނުން ރާވައިރު ސަމާލުކަންދޭން ޖެހޭ ކަމެކެވެ. މިކަމުގައި ވިސްނަން ޖެހޭ މުހިއްމު އެއްކަމަކީ، ގިނަފަހަރަށް ތީމް ބޭނުންކޮށްގެން ކިޔަވައިދިނުން ރާވާއިރު އެކި ދުވަސްތަކުގައި އޮންނަ ހަރަކާތްތައް/އިވެންޓްތައް ތަފާތުވާނެއެވެ. މިހެންކަމުން މިގޮތަށް ކިޔަވައިދޭއިރު މުދައްރިސުންގެ މެދުގައި މަޝްވަރާކުރެވި، ހުރިހާ އެންމެ އެއް އަމާޒަކަށް ގޯލް ކަނޑައަޅައި ފަރުވާތެރިކަމާއެކު ރާވައިގެން ފަރުމާކުރެވިގެން ނޫނީ ބޭނުންވާ މަގުސަދުތައް އެންމެ އެދެވޭގޮތުގައި ހާސިލުކުރަން ދަތިވާނެއެވެ. ކޮންމެ މާއްދާއެއް ވަކިން ކިޔަވައިދިނުމާއި ތީމް ބޭނުންކޮށްގެން ކިޔަވައިދިނުމުގައި ހިމެނޭ އެންމެ ބޮޑު ގޮންޖެހުމަކީ އެއީއެވެ. މުމްފޯރޑް (2000) ލިޔުއްވާފައިވާ ގޮތުގައި ތީމް ބޭނުންކޮށްގެން އުނގެނުން ރާވާއިރު މައިގަޑު ހަތަރު ހަރުފަތަކަށް މުދައްރިސުން ސަމާލުވުން މުހިއްމެވެ. މިހަތަރު ހަރުފަތުގެ ކުރު ސަމަރީއެއް ހޫލަ1 ގައި ދެވިފައި އެވަނީއެވެ. މިހަރުފަތްތަކުގެ ތަފުސީލު މިސާލާއެކު ހޫލައަށް ފަހު ހިމަނާލާނަމެވެ.
ހޫލަ 1. ތީމް ބޭނުންކޮށްގެން ކިޔަވައިދިނުމުގެ ހަރުފަތްތައް
- ތީމެއް ކަނޑައެޅުން: މިހަރުފަތުގައި ކުރެވޭނެ މަސައްކަތަކީ، އެއްކޮށްގެން ކިޔަވައިދޭ މާއްދާތަކުގެ މުދައްރިސުންގެ ބައްދަލުވުން ބާއްވާ ކޮންމެ މާއްދާއެއްގައިވެސް ހިމަނަން ޖެހޭ ބައިތަކާއި، ހާސިލުކުރަން ކަނޑައެޅިފައިވާ ގޯލްތަކާއި، ކަންތައްތައް ރަގަޅަށް މަޝްވަރާ ކުރެވި ދަރިވަރުންގެ ޢުމުރާއި އަދި ގޮތްތަކާއި ޝައުގުވެރިކަމާއި ގުޅޭނެ ފަދަ ތީމެއް ކަނޑައެޅުމަށެވެ. މިގޮތުން ތީމް ކަނޑައަޅާއިރު، އެދުވަސްވަރަކާއި ގުޅޭ ގައުމީ ފެންވަރުގައި ނުވަތަ ބައިނަލް އަގުވާމީ ފެންވަރުގައި ފާހަގަ ކުރާ ދުވަސްތަކާއި ގުޅޭގޮތަށް ވެސް ތީމު ނެގެއެވެ. ހަމައެގޮތަށް ދަރިވަރުންނާ ގުޅޭ ތަފާތު ބޮޑު އިވެންޓެއް ނުވަތަ ހަރަކާތެއް ރޭވޭފަދަ ތީމެއްވެސް ނެގިދާނެއެވެ. މިސާލަކަށް ދިވެހިކާނާ، ދިވެހި ހެދުން، ގައުމީ ދުވަސް، ކުޑަކުޑިންގެ ދުވަސް، މިފަދަ ކޮންމެ ކަހަލަ ދުވަސްތަކެއް ވެސް ތީމަކަށް ހެދިދާނެއެވެ. އަދި އޭގެ އިތުރުން އާދައިގެ މުހިއްމު ބައެއް ތަކެތިވެސް ތީމުގޮތަށް ނެގިދާނެއެވެ. މިސާލަކަށް، ގަސް، ފަތް، ދޫނި، އަތިރިމަތި، ރުއް، ފަދަ ކޮންމެ ބާވަތެއްގެ ތީމެއްވެސް ދަރިވަރުންގެ ޢުމުރާއި ގުޅޭ ގޮތަކަށް ތީމެއްގޮތުގައި ބޭނުން ކުރެވިދާނެއެވެ. ޢަމަލީކޮށް މިކަންކުރެވޭގޮތަށް ބަލާއިރު ކޮންމެ ހަފުތާއަކު ކޯރޑިނޭޝަން ބައްދަލުވުމުގައި ތީމު ކަނޑައަޅައި ފިލާވަޅު ރޭވިދާނެއެވެ. މިބައްދަލުވުމުގައި ތީމް ބޭނުންކޮށްގެން ކިޔަވައިދިނުން ގެންދާނެގޮތުގެ ހުރިހާ ތަފުސީލެއް ލިޔެ، ތަންފީޒީ މަރުހަލައިގައި ކުރާނެ ކަންތައްތައް ތަފުސީލުކޮށް، ވަކިވަކިން ބޭނުންވާނެ މެޓީރިއަލްތަކާއި، ކުރަންޖެހޭ ކަންތައްތަކާއި، ހޯދަންޖެހޭ ވަސީލަތްތަކާއި، ބެލެނިވެރިންނަށް އަންގަންޖެހޭ ކަމެއްވާނަމަ އެކަންކަމާއި އަދި ދަރިވަރުންނަށް ދޭންޖެހޭ އިރުޝާދެއްވާނަމަ އެއިރުޝާދުތަކާއި ހުރިހާ ތަފުސީލުތައް ހިމަނައިގެން ހަފުތާގެ ކިޔަވާދިނުން ރޭވެއެވެ. ޢާއްމުގޮތެއްގައި މިއީ ވަރަށް ތަފުސީލާއެކު ކޮލެބޮރޭޓިވް (ގިނަމުދައްރިސުން ބައިވެރިވެގެން) ލިޔެވިފައި އޮންނަ ލެސަން ޕްލޭން އެކެވެ.
- ދުރާލާ ތައްޔާރުވުން: ކޯރޑިނޭޝަން ބައްދަލުވުމުގައި ލިޔެފައިވާ ތަފުސީލުތަކަށް ބަލާ ބޭނުންވާނެ ހުރިހާ އެއްޗެއް ހޯދާ، އަންގަންޖެހޭ އެންގުންތައް އަންގަންޖެހޭ ފަރާތްތަކަށް އަންގައި ކިޔަވާދިނުމަށް ބޭނުންވާނެ ހުރިހާ ވަސީލަތްތައް (އަސްލުތަކެތި، ލިޔުންތައް، ޓެކްނޮލޮޖީގެ ވަސީލަތްތައް އަދި އެހެނިހެން) ހަމަކޮށް ކުލާސްތެރެ ހުންނަން ވާގޮތް، ދަރިވަރުންގެ ކަންކަން ރާވާހިންގާނެ ގޮތް އަދި މިނޫންވެސް ބޭނުންވެދާނެ ހުރިހާކަމަކަށް ކުރިޔާލައި ތައްޔާރުވުން ހިމެނެއެވެ.
- ރޭވިގޮތަށް ތަންފީޒު ކުރުން: މިހަރުފަތަކީ ކިޔަވައިދިނުމުގެ ޢަމަލީ މަސައްކަތްތައް ހިނގާ ހަރުފަތެވެ. ކުރިން އިސްވެދިޔަ ދެހަރުފަތުގެ މަސައްކަތް ރަގަޅަށް ގެންދެވިފައިވާނަމަ މިހަރުފަތަކީ ފަސޭހަކަމާއެކު ކުރެވޭނެ ކަމެކެވެ. ދަރިވަރުންގެ އުނުގެނުމުގެ ހުރިހާ ހަރަކާތެއް ރޭވިފައިވާ ގޮތަށް، ތަންފީޒުކުރާއިރު އެންމެ ބޮޑަށް ސަމާލުވާން ޖެހޭނީ އުގެނުމަށް ފަހިވާ ގޮތަށް ވަޒަންކުރުމާއެކު، ހުރިހާ ދަރިވަރުންގެ ބައިވެރިވުން ހިމެނޭފަދަ ގޮތަކަށް ކަންތައް ތަންފީޒު ކުރުމަށެވެ.
- ކިޔަވައިދިނުން ގެންދެވުނު ގޮތް ވަޒަންކުރުން: މި ހަރުފަތަކީ ތީމް ބޭނުންކޮށްގެން ކިޔަވައިދިނުން ރޭވުނު އިރު ހާސިލު ކުރަން ބޭނުންވި ގޯލްތައް ހާސިލުވި މިންވަރާއި، ދަރިވަރުންގެ ބައިވެރިވުމާއި، ޝައުގުވެރިކަން ހިފެހެއްޓުނު ގޮތާއި، ކިޔަވައިދިނުމުގައި ރޭވި ހުރިހާ ކަމެއް ކުރެވުނު ފެންވަރު ބަލައި މުދައްރިސުންނަށް ރިވެލި ކޮށްލަންވެސް ލިބޭ ފުރުޞަތެކެވެ. ހަމައެއާއެކު، ކުރިއަށް އޮތްތާގައި އިތުރަށް ރަގަޅު ކުރާނެކަންކަން ލިޔެ ހާސިލުކުރެވުނު ކާމިޔާބީތައް ފާހަގަކުރުންވެސް މިހަރުފަތުގައި ހިމެނެއެވެ.
އިސްވެދިޔަ ހަރުފަތްތަކުގައި ދެވިފައިވާ ތަފުސީލުތައް ކުލާސްރޫމުގައި ބޭނުންކުރާނެ ގޮތްތަކުގެ ތަފާތު މިސާލުތައް ޔޫޓުޔިބުގައި ވަރަށް ގިނައިން ދެވިފައިވެއެވެ. މިފަދަ މިސާލެއް ބައްލަވާލެއްވުމަށް ދެވިފައިވާ ވީޑިއޯ އަށް ފިއްތަވާލައްވާށެވެ.
ތީމް ބޭނުންކޮށްގެން ކިޔަވައިދޭއިރު މުދައްރިސުންގެ ދައުރު
ތީމް ބޭނުންކޮށްގެން ކިޔަވައިދޭއިރު މުދައްރިސުގެ ރޯލުތަކުގެ ތެރޭގައި އެންމެ ބޮޑަށް ފާހަގަކޮށްލެވެނީ ކޯރޑިނޭޓްކުރުމާއި (ހުރިހަކަމެއް ފަސޭހަކަމާއެކު ގެންދިއުމަށް އެކި މުދައްރިސުން މެދުގައި ރަގަޅަށް މުވާސަލާތުކުރުން) އަދި ފެސިލިޓޭޓް (ކަންކަން ގެންދަންވާގޮތާ މެދު ދަރިވަރުންނަށް އިރުޝާދުދީ މަގުދެއްކުން) ކުރުމެވެ. ހަމަ މިއާއެކު ދިމާވެދާނެ ދަތިތަކާއި އަދި އުދަގުލަކަށް ހޭލައި ހުރުމާއެކު ބަދަލުގައި ކުރެވިދާނެ ކަންތައްތަކަށްވެސް ކުރިޔާލާއި ތައްޔާރުވެ ސަމާލުވެ ހުރުންވެސް މުދައްރިސުގެ ރޯލު ތެރޭގައި ހިމެނެއެވެ. މިގޮތަށް ކިޔަވައިދިނުން ގެންދާއިރު ގިނަފަހަރަށް ތަފާތު އިވެންޓް/ހަރަކާތްތައް އެކި ދުވަހު ތަފާތުވުމުން މުދައްރިސުން ކުރަންޖެހޭ މަސައްކަތްތައްވެސް އެކި ދުވަހު ތަފާތު ވެގެންދެއެވެ. ނަމަވެސް އުސޫލެއްގެ ގޮތުން އެންމެ މުހިއްމު ދެރޯލަކީ ކުރިންވެސް ދެންނެވުނު ފަދައިން ކޯރޑިނޭޓް ކުރުމާއި ފެސިލިޓޭޓް ކުރުމެވެ.
ތީމް ބޭނުންކޮށްގެން ކިޔަވައިދިނުމުން ދަރިވަރުންނަށް ލިބޭނެ ފައިދާތައް
ތީމް ބޭނުންކޮށްގެން ކިޔަވައިދޭނަމަ ދަރިވަރުންގެ އުނގެނުމުގެ މާހައުލަކީ ހަރަކާތްތެރި ޝައުގުވެރި، އަދި އެންމެން ބައިވެރިވެގެން ކަންތައްތައް ކުރެވޭ މާހައުލަކަށް ބަދަލުވެއެވެ. ހަމަ މިއާއެކު، އުނގެނުމަކީ މަޖުބޫރުވެގެން ކުރާކަމެއްގެ ބަދަލުގައި އޭގައި އެކުލެވޭ އުނގެނުމުގެ ތަޖުރިބާތައް ދަރިވަރުންނަށް މާނަހުރި ދިރިއުޅުމުގެ ކަންކަމާ ގުޅޭ އަދި އެހާނމެ މަޖާ، ޢަމަލީކަންތައްތަކަށް ބަދަލުވެއެވެ. ހަމަމިބީދައިން، ދަރިވަރުގެ އުނގެނުމުގައި އެންމެން އެއްކޮށް ކުރާ މަސައްކަތެއް ކަމުގެ އިހުސާސް ބޮޑުވެ އުގެނުމަށް އޮންނަ ފޯރި އާއި ޝައުގުވެރިކަން ބޮޑުވުން ހިމެނެއެވެ. ތީމު ބޭނުންކޮށްގެން ކިޔަވައިދޭއިރު މުދައްރިސުގެ އިތުރުން ބެލެނިވެރިންނަށްވެސް ދަރިންގެ އުނގެނުމުގައި ބައިވެރިވުމުގެ ފުރުސަތުތައް އިތުރުވެ، ދަރިވަރުގެ ސްކޫލުގެ މާހައުލާއި ގޭގެ މާހައުލު ގުޅުން ރަގަޅުވެއެވެ. މީގެ މިސާލަކީ، ތީމް ބޭނުންކޮށްގެން ކިޔަވައިދޭއިރު، ވަރަށް ގިނަ ފަހަރަށް މަހެއްގެ ތެރޭގައި އެއްދުވަހަކީ ކޮންމެސް އިވެންޓެއް ނުވަތަ ބޮޑު ހަރަކާތެއް ގޮތަށް ރޭވޭ ދުވަހަކަށް ހެދިދާނެއެވެ. އަދި އެކަމުގެ ސަބަބުން މުދައްރިސުންނާއި، ދަރިވަރުން އަދި ބެލެނިވެރިން އެކަމުގައި އެއްކޮށް ބައިވެރިވުމަށް ފުރުސަތު ލިބެއެވެ. މިފަދަ ކަންކަމަކީ ދަރިވަރުންގެ އުނގެނުމުގެ ތަޖުރިބާތައް ދެމެހެއްޓެނިވި ގޮތަކަށް ގެންދިޔުމަށާއި އެކުދިންގެ ދުޅަހެޔޮ ކުރިއެރުމަށް އެހީތެރިވެދޭނެ ކަންކަމެވެ.
ތީމް ބޭނުންކޮށްގެން ކިޔަވައިދިނުމަކީ އަޅުގަޑުމެން މުދައްރިސުން އަދި އެހާ ބޮޑަށް އަހުލުވެރި ފަރިތަ ގޮތްތަކެއް ނޫންކަމުން މީގޮތަށް ކިޔަވައިދިނުމުގައި ދިވެހިރާއްޖޭގައި ހުރެދާނެ ގޮންޖެހުންތަކަކާއި ދަތިތަކަކީ ދިރާސާކުރުން މުހިއްމު މައުޟޫޢެކެވެ. ގަބޫލު ކުރަން ޖެހޭ ހަޤީޤަތަކީ، މިހާރުގެ ދިވެހިރާއްޖޭގެ ކަރިކިއުލަމުގައި ކަނޑައެޅިފައިވާ ގާބިލިއްޔަތުތައް ހާސިލުވާނީ މިވާހަކަ ކޮޅުގައި އިޝާރާތް ކުރެވިފައިވާ މިވާ ތީމް ބޭނުންކޮށްގެން ކިޔަވައިދިނުން ފަދަ އުސޫލުތަކާއި އަދި ކިޔަވައިދިނުމުގެ ފަހުގެ ފިލޯސަފީތައް ތަންފީޒުކޮށްގެންނެވެ. މިފަދަ ކިޔަވައިދިނުމުގެ ގޮތްތަކަށް އަޅުގަޑުމެން މުދައްރިސުން ފަރިތަވެ، އަހުލުވެރިވާ މިންވަރަކުން މިހާރުގެ ކަރިކިއުލަމަކީ ތަންފީޒު ކުރަންފަސޭހަ އެއްޗަކަށް ހެދިދާނެއެވެ. މުދައްރިސުންގެ އެންމެ ބޮޑު އެއްޝަކުވާއަކީ މިހާރުގެ މަންހަޖުގައިވާ ގާބިލިއްޔަތުތައް ހާސިލުވިތޯ ނޫންތޯ ކަށަވަރު ކުރާނީ ކިހިނެއްކަން ސާފުކޮށް އެނގެން ނެތުމެވެ. މިކަން މިގޮތަށް ދިމާވަނީ، ޢާއްމުކޮށް މިކިޔަވައިދޭ ޓްރެޑިޝަނަލް (ގަދީމީ) ކިޔަވައިދިނުމުގެ ގޮތްތައް ބޭނުންކޮށްގެން ކަނޑައެޅިފައިވާ ގާބިލިއްޔަތުތައް ހާސިލުކުރަން ދަތިވުމެވެ. އަޅުގަނޑު އުއްމީދު ކުރަނީ، މިއަދުގެ ވާހަކަ ކޮޅުގައިވެސް ހިމަނާލެވުނު ޚިޔާލުތަކާ މެދު ފުންކޮށްވިސްނާ މިފަދަ ގޮތްތައް ކިޔަވައިދިނުމުގައި ތަންފީޒުކުރުމުގެ ޝައުގުވެރިކަން ހުންނަ ބަޔަކަށް މުދައްރިސުންވުމެވެ.
