މިއަދު ލިޔެލަން ގަސްތުކޮށްފައި މިވަނީ މިޒަމާނުގެ ކިޔަވައިދިނުން ރާވާއިރު ސަމާލުކަންދެވޭ މުހިންމު އުނގެނުމުގެ ވައްތަރަކަމަށްވާ ކޮލެބޮރޭޓިވް ލާރނިން އާ ބެހޭގޮތުންނެވެ. 21 ވަނަ ގަރުނުގެ ޖީލުތަކުގެ ކުދިންނަށް ކޮންމެހެން އެނގެންޖެހޭ އެއް ހުނަރަކީ އެކުވެ ބައިވެރިގެން ކުރާ މަސައްކަތްތައް ކުރުމަށެވެ. ސަބަބަކީ މިޒަމާނުގެ ގިނަ މުއައްސަސާތަކުގެ މަސައްކަތު މާހައުލަކީ އެންމެން ބައިވެރިވެގެން މަސައްކަތްތައް ކުރާ ޕްރޮޖެކްޓްތައް ހިމެނޭ ވަޒީފާގެ މާހައުލެކެވެ. މިޒަމާނުގެ ކުދިން ސްކޫލު ނިމިގެން ނުކުންނައިރު މިފަދަ ކަންތައްތަކަށް ތިބެންޖެހެނީ އަހުލުވެރިވެ ތަޖުރިބާތައް ލިބިފައެވެ. ކޮލެބޮރޭޓީވް ލާރިނިން އަކީ އެކުގައި މަސައްކަތްކޮށް ބައިވެރިވެގެން ކަންތައްތައް ނިންމުމުގެ ހުނަރު ތަރައްގީކުރުމުރަށް ވަރަށް އެކަށޭނަ އުނގެނުމުގެ ވައްތަރެކެވެ.
ކޮލެބޮރޭޓިވް ލަރނިން އަކީ އެއް ސިކުނޑިއަށް ވުރެ ގިނަ ސިކުނޑިތަކެއްގެ ބައިވެރިވެގެން ކަމަކާ ގުޅޭ ގޮތުން ވިސްނާ ކުރެވޭ ޚިޔާލުތައް އެއްކޮށްގެން އުނގެނުމުގެ މަސައްކަތް ކުރުމެވެ. މިގޮތުން އުނގެނުމުގެ ހަރަކާތްތަކުގައި ދަރިވަރުން އެކު އެކީ ބައިވެރިވެ ވިސްނައިގެން މަސައްކަތްކުރުމަށް ފުރުސަތު ފަހިކޮށްދިނުން މުހިންމެވެ. މިފަދަ އުނގެނުމަކީ ދަރިވަރުންގެ ވިސްނުން ތަރައްގީވުމަށް އެހީތެރިވެދޭ އަދި ހަމައެހެންމެ ކްރިޓިކަލް ތިންކިން ފަދަ ބިނާކުރަނިވި ވިސްނުންތަކަށް ދަރިވަރުންގެ ސިކުނޑިތައް ހާނުވާ ފަރިތަކުރުވޭ އުނގެނުމުގެ ބާވަތެކެވެ.
ކޮލެބޮރޭޓިވް އުނގެނުމުގެ ވިސްނުމަކީ ލެވް ވައިގޮޓްސްކީގެ (1978) މައިގަނޑު ތިއަރީގެ ބަޔާންކޮށްފައިވާ ޒޯން އޮފް ޕްރޮކްސިމަލް ޑިވިލޮޕްމަންޓްގެ ތަޢާރަފުގެ ތެރެއިން ވުޖޫދުވި އުނގެނުމުގެ ބާވަތެކެވެ. މި ތިއަރީގައި ވަގޮޓްސްކީ އިރުޝާދުދެއްވާފައިވާނީ ދަރިވަރުންގެ އުނގެނުން ކުރިއަރާ ދަނީ އެކުގައި އުޅޭ ދަރިވަރުންނާއެކު އެއްކޮށް ބައިވެރިވެ އުނގެނުމުގެ ތަޖުރިބާގެ ތެރެއިން ކަމެވެ. މިވިސްނުމުގައި އެންމެ ބޮޑަށް ފާހަގަކޮށްލެވެނީ އުނގެނުން ހިނގަނީ އެއްކޮށް ވާހަކަ ދައްކާ އެކަކު އެނެކަކުގެ ޚިޔާލުތައް ހިއްސާކުރުމާއި ކުރެވޭ ދޭދޭ މުޢާމަލާތްތަކުގެ ތެރެއިން ކަމެވެ. މިތިއަރީގެ މައްޗަށް ބިނާކޮށް ކިޔަވާދިނުމުގެ ވަރަށް ގިނަ ގޮތްތަކާއި ވައްޓަފާޅިތައް ކުލާސްރޫމުގެ މާހައުލުގައި ބޭނުން ކުރެވެއެވެ. ބައެއް ޢިލުމުވެރިން ދެކިލައްވާގޮތުގައި ކޮލެބޮރޭޓިވް ލާރނިން އަކީ ދަރިވަރުންނަށް ހަވާލު ކުރެވޭ ގުރޫޕް މަސައްކަތްތަކުގެ ތެރެއިން އެންމެން އެއްކޮށް ކަންތައްތަކެއް ކޮށްގެން މަގުސަދު ހާސިލުވާގޮތަށް ކިޔަވައިދޭ އިރު ރޭވޭ އުނގެނުމުގެ ފުރުސަތުތަކެއް ކަމެވެ (ޗިއު، 2004). މި ފިލޯސަފީ އަށް ތާއީދު ކުރައްވާ ބޭފުޅުންގެ ތެރެއިން ގޮކޭލި (1995) އިޝާރާތްކުރައްވާ ގޮތުގައި ކޮލެބޮރޭޓިވް ލާރނިންގެ ސަބަބުން ދަރިވަރުންގެ ހައަރ އޯޑަރ ތިންކިން (މަތީ ލެވެލްގެ ވިސްނުން) ކުރިއެރުވުމަށް ވަރަށް ބޮޑަށް އެހީތެރިވެއެވެ.
މި ގޮތަށް އުނގެނުމުގެ ތެރެއިން ދަރިވަރުންނަށް ލިބޭ ތަޖުރިބާތައް ނުހަނު ގިނައެވެ. މިސާލަކަށް ތަފާތު ވިސްނުންތައް ބިނާކުރުން، އާޚިޔާލުތައް ހުށަހަޅުން، އެހެންމީހުންގެ ވިސްނުން ބަލައިގަތުން، އެވިސްނުންތަކާމެދު ޚޔާލު ކުރަން ފުރުޞަތު ލިބުން، ޚިޔާލު ހުށަހެޅުމަށް ސިކުނޑި ހޭނުން، ރީޒަން، ނުވަތަ ސަބަބަކާއެކު ވާހަކަ ދައްކާ ޚިޔާލު ކުރަން ދަސްވުން، އެހެން މީހުން ދައްކާ ވާހަކަ އަޑު އަހަން ފަރިތަވުން، ގިނަ މީހުން އެއްބަސްވާގޮތަކަށް ކަންކަން ނިންމަން އެނގުން، ކަންކަމުގައި އަމިއްލަ/ޒާތީ ވިސްނުން އިސްނުކޮށް ގޮތްދޫކުރަން ދަސްވުން، ވަކި ކަމެއް ވަކި ގޮތަކަށް ނިންމުމަށް އެއްބަސްވުމަކަށް ޚިޔާލު ކުރަން އެނގުން، މިފަދަ އެތަސް ހުނަރުތަކެއް ކޮލެބޮރޭޓިވް ލާރނިންގެ ފައިދާތަކުގެ ތެރޭގައި ހިމެނެއެވެ. ކޮލެބޮރޭޓިވްކޮށް އުނގެނުން ރޭވުމަކީ ކޮންމެ އުމުރެއްގެ ދަރިވަރުންނަށް ވެސް މިޒަމާނުގެ ކުލާސްރޫމުތަކުގައި ބާރު އަޅާކަމެކެވެ. މިގޮތުން މިފަހަރު ކުލާސްރޫމުގެ މިސާލުގޮތުގައި ހިމަނާލާފައިވާ މިވާ ވީޑިއޯ އަކީ އެންމެ ތުއްތު ކުދިންގެ ކުލާސްރޫމެއްގައި ކޮލެބޮރޭޓިވް ހަރަކާތް ރާވާ ކުރިޔަށް ގެންދާނެ ގޮތް ދައްކައިލައިފައިވާ މިސާލެކެވެ. ބައްލަވާލެއްވުމަށް ވީޑިއޯ ލިންކަށް ފިއްތަވާލައްވާށެވެ.
މިވީޑިއޯ ގައިވެސް އިޝާރާތްކޮށްފައިވާ ފަދައިން ކޮލެބޮރޭޓިވް ލަރނިންގެ އުސޫލުތައް ބޭނުންކޮށްގެން ކުލާސްރޫމުގައި އުނގެނުން ރާވާނަމަ އެންމެ ބޮޑަށް ހާސިލުވާ ފައިދާއަކީ އުނގެނުމުގެ އެންމެ ފުންމިނަށް ދާން ދަރިވަރުންނަށް އެހީތެރިވެދިނުމެވެ. މިކަމަށް ޚާއްޞަކޮށް ލިޔުއްވާ އެއް ތަޖުރިބާކަރެއް ކަމުގައިވާ، ރިބެކާ އަލްބަރ (2017) ފާހަގަކުރެވެއެވެ. މދެންނެވި ގޮތަށް އުނގެނުމުގެ ފުންމިނަށް ދަރިވަރުން ގެންދިއުމަށް އަންނަނި ކަންތައްތައް ކުލާހުގައި ރޭވިދާނެ ކަމަށް ރިބެކާ އިރުޝާދު ދެއްވައެވެ.
- ތަފާތު ކަންކަމުގައި ގުރޫޕް އެއްބަސްވާން އެހީތެރިވެދިނުން: މިކަމަށް އެހީތެރިވެދިނުމުގެ ގޮތުން ގުރޫޕް މަސައްކަތްތައް ހަވާލު ކުރާއިރު ދަރިވަރުންގެ މެދުގައި މަސައްކަތް ނިންމުމަށް ވަކި ޚާއްޞަގޮތްތަކެއް ރޭވުމަށް އިރުޝާދު ދެވިދާނެއެވެ. މިގޮތުން އަމިއްލައަށް އެކި ކުދިން އެކި ކަންކަމާ ހަވާލުވެ، ނިންމަން ޖެހޭ ގަޑިއަކަށް ކަންކަން ނިންމުމަށް ވާހަކަ ދައްކަން ފުރުސަތު ދެވޭނެއެވެ. ޚާއްޞަކޮށް ކޮލެބޮރޭޓިވް ލާރނިން ބޭނުން ކުރެވޭ އުނގެނޭ މާހައުލުތަކުގައި ދަރިވަރުން އަމިއްލައަށް ނަގާ ޒިންމާ ބޮޑުވާނެއެވެ. އަދި ހަމައެހެންމެ އެމީހުންގެ މަސްއޫލިއްޔަތު އަދާކުރުމާއި އަދި އެކަމުގެ ޒިންމާ ނެގުމުގެ ވިސްނުން ހަރުލުމަށް ވެސް އެހީތެރިވެދެއެވެ.
- އެހެންމީހުން ދައްކާ ވާހަކަ އަޑުއަހަން އާދަކުރުވުން: ކޮލެބޮރޭޓިވް ލާރނިންގެ މާހައުލުތަކުގައި އެންމެ ބޮޑަށް ފާހަގަ ކުރެވޭ އެއްކަމަކީ ގުރޫޕެއްގައި ދަރިވަރުން މަސައްކަތް ކުރަމުންދާއިރު އެކަކު އަނެކަކު ދައްކާ ވާހަކަ އަޑު އެހުމަށް ދަރިވަރުން އަހުލުވެރިވެ އެކަމަށް އާދަވާން ފުރުސަތު ލިބޭކަމެވެ. މީގެ ސަބަބުން އެއްބަޔަކު އަނެއް ބަޔަކަށް އިހުތިރާމު ކުރުމާ އަދި އެކަކު އަނަކަކުގެ ރައުޔު ބަލާގަތުން ފަދަކަންތައްތަކަށް ވެސް ދަރިވަރުން ފަރިތަވެއެވެ.
- ކަންކަމާ ގުޅޭގޮތުން ރަނގަޅު ސުވާލު ކުރަން އުނގަންނާދިނުން: ކޮލެބޮރޭޓިވްކޮށް އުނގެނުން ރޭވުމުން ދަރިވަރުންނަށް މީހުން ދައްކާ ވާހަކަ އަޑު އަހައި ކޮންމެ ކޮންމެ ސުވާލެއް ކުރުމުގެ ބަދަލު ދައްކާ ވާހަކައާ އަދި ހާލަތާ ގުޅޭގޮތުން ރަގަޅަށް ސުވާލު ކުރަން ވެސް އެހީތެރިވެދެއެވެ. ވަރަށް ގިނަފަހަރަށް ރަގަޅަށް އަޑު އެހުމަށް ފަރިތަވުމާއެކު އެކި ކަންކަމާ މެދު ވިސްނާ އެނިންމަން ޖެހޭ މަސައްކަތާމެދު އެކަކު އަނެކަކާ ވާހަކަ ދެއްކުމުގެ މުޢާމަލާތް ވަރަށް ބޮޑަށް ކުރެވެއެވެ.
- މައްސަލަ ހައްލު ކުރުމުގައި ނިގޯޝިއޭޓްކުރަން ކިޔައިދިނުން: ކޮލެބޮރޭޓިވް އެކްޓިވިޓީތައް އުނގެނުމުގެ މާހައުލުގައި ގެންދެވޭނަމަ ކަންކަމުގައި ހައްލު ހޯދުމަށް ނުވަތަ ވާހަކަ ދައްކައިގެން ކަންކަމުގެ ގޮތްހޯދުން ހިމެނެއެވެ. ޚާއްޞަކޮށް ކަންކަމުގައި އެންމެ އަޑު ގަދަ މީހާ ދައްކާ ވާހަކަ އަޑު އެހުމަށްވުރެ، އެހެންމީހުންގެ ވާހަކަ އަޑުއަހާ އެހެން މީހުންނަށް އިހުތިރާމާއެކު މުޢާމަލާތް ކުރުމާ ވާހަކަ ދައްކައިގެން ކަންކަމުގެ ނިންމުން ނިންމަން ދަސްވުން ވެސް ހިމެނެއެވެ.
- ކަންކަމުގައި އެއް ސިކުނޑިއަށް ވުރެ ގިނަ ސިކުނޑީގެ ބާރު ދެނެގަތުން: މިކަމަކީ ކޮލެބޮރޭޓިވްކޮށް އުނގެނެމުން ދާއިރު އެކަކުގެ ސިކުނޑިން ވިސްނުމަށް ވުރެ ގިނަ މީހުންގެ ބައިވެރިވުމުން ވިސްނޭ ވިސްނުންތަކުގެ އޮއްޓަރު ރަނގަޅުކަން ހާމަވެ ތަޖުރިބާ ކުރުމުގެ ފުރުސަތު ވެސް ލިބުމެވެ.
މިކަންތައްތައް ހާސިލު ކުރުމަށް ކުލާހުގައި ގެންދެވިދާނެ ތަފާތު ހަރަކާތްތަކުގެ މިސާލުތައް ތިރީގައިވާ ތާވަލުގައި ހިމަނާލެވިފައިވާ އެވަނީއެވެ.
ކޮލެބޮރޭޓިވް އުނގެނުން ހިމަނައިގެން ގެންދެވިދާނެ ކުލާސްރޫމު ހަރަކާތްތައް
|
ހަރަކާތް |
ތަފުސީލު |
ސަމާލުކަން ދޭންޖެހޭ ކަންތައްތައް |
|
ސްޓަމްޕް ޔޯ ޕާރޓްނާރ
|
· ފިލާވަޅެއް ކިޔަވައިދީ ނިމުމުން ދަރިވަރުން ގާތުގައި ޖެހިގެން އިންނަ ދަރިވަރަކާއި ޗެލެންޖިން ސުވާލެއް ކުރަން ފުރުސަތު ދިނުން. އަދި ސުވާލު ކުރުމުން އެސުވާލު ލިޔެ އެއަށް ދޭނެ ޖަވާބާ މެދު ޚިޔާލު ކުރަން ބުނުން |
· ސީދާ ކޮންޓެންޓުން ސުވާލު ކުރުމަށް ވުރެ ހައަރ އޯޑަރ ތިންކިން ނުވަތަ މަތީ ލެވެލްގެ ވިސްނުންތަކާއި ގުޅޭ ސުވާލު ކުރަން ދަރިވަރުންނަށް އިރުޝާދު ދިނުން. އަދި އޯޕަން އެންޑެންޑް (ހުޅުވާ ލެވިފައިވާ ބާވަތް) ސުވާލު ކުރަން ބުނުން |
|
ތިންކް-ޕެއަރ-ޝެއަރ
|
· މިގޮތަށް ހަރަކާތް ރާވާއިރު މުދައްރިސު ދަރިވަރުންނާއި ކުރިމަތި ކުރުވާނީ ބޮޑު ސުވާލެކެވެ. މިސުވާލުގެ ޖަވާބު ދެވޭނީ ތަހުލީލުކޮށް، ވަޒަންކޮށް، ބައިތަކެއް ގުޅުވައިގެންނެވެ. · ދަރިވަރުން ޖަވާބުދިނުމަށް ވަގުތު ކޮޅެއް ހޭދަކޮށް ވިސްނާނެއެވެ. ދެން ކައިރީގައި ތިބޭ ގުރޫޕްގެ ބައިވެރިންނާއެކު ދޭނެ ޖަވާބު ހިއްސާ ކުރާނެއެވެ. · އެއަށް ފަހު އެހެން ދަރިވަރުން އެސުވާލަށް ދޭނެ ޖަވާބު ނުވަތަ ޖަވާބު އެނގޭ ކުއްޖަކު އިންތޯ ބަލާނީއެވެ. އަދި އެކުއްޖެއްގެ ޖަވާބާ އެހެން ކުދިންގެ ޖަވާބު ތަފާތުވާ ނަމަ ނުވަތަ އެއްގޮތްތޯ ބަލާނީއެވެ. އެއަށްފަހު މުޅި ކުލާހުގެ ދަރިވަރުންނާއެކު އެސުވާލުގެ ޖަވާބު ހިއްސާ ކޮށް މަޝްވަރާ ކުރާނީއެވެ. |
· ހަރަކާތް ފެށުމުގެ ކުރިން ވިސްނާ ވަގުތު ކަނޑައެޅުން މުހިންމު ވާނެއެވެ. އަދި ހަމައެހެންމެ ޕެއަރ/ބައިވެރިވާނީ ކާކާއެކު ކަން ވެސް އޮންނަން ޖެހޭޏީ ހަމަޖެހިފައެވެ. · ގުރޫޕްގެ ސުވާލު ހިއްސާކޮށް މަޝްވަރާ ކުރާއިރު އަޑު ގަދަ ވިޔަ ނުދީ އެންމެނަށް ވެސް ހަމަޖެހިގެން ވާހަކަ ދެއްކޭ ފަދަ ގޮތަކަށް ގުރޫޕްގެ އަޑު މެނޭޖުކުރުމަށް ވެސް އިރުޝާދު ދޭން ޖެހޭނެއެވެ. މިފަދަ ހަރަކާތްތަކުގެ ސުވާލު ދޭއިރު މަޢުލޫމާތު ލެވެލް ސުވާލު ދިނުން ރަގަޅެއް ނޫނެވެ. އެއާއި ޚިލާފަށް ކުދިންނަށް ވާހަކަ ދެއްކޭފަދަ ހުޅުވާލެވިފައިވާ ސުވާލުތައް ކުރިމަތި ކުރުވުން މުހިންމެވެ. |
|
ކެޓޗަޕް
|
· ކިޔަވައިދެމުން ދާއިރު ބައިތަކެއް ކިޔައިދީ ނިމުމުން މުދައްރިސް އިރުކޮޅަކަށް ހުއްޓާލުން، މިހާރު މިއީ ދަރިވަރުންގެ ވަގުތު ކަމަށް ބުނެ، ކުލާހުގެ ކުދި ގުރޫޕު އެކި ކުދިންގެ ނޯޓްސް ކޮމްޕެއަރ (އަޅާ ކިޔާ) ލިޔެވިފައިވާ ނޯޓްސްތަކުން ސުވާލު އުފައްދާ ކުރެވިދާނެ ސުވާލުތަކެއް ނޯޓްކުރަން ބުނުން، އެއަށް ފަހު ސުވާލު ކުރަން ފުރުސަތުދިނުން |
· މިފަދަ ހަރަކާތްތައް ކުލާހުގައި ގިނަގިނައި ގެންދިއުން މުހިންމެވެ. ދަރިވަރުންގެ ވަގުތު ކޮންމެ އިރެއްގައިވެސް މުދައްރިސް ބައިތަކެއް ކިޔައިދީ ނިމުމުން އައިސްދާނެކަން ދަރިވަރުންނަށް އޮންނަން ޖެހޭނީ ސިގްނަލް ކޮށްފައެވެ. މިސާލަކަށް ފިލާވަޅުގެ ބައިތައް ކިޔައިދޭން ފެށުމުގެ ކުރިން ހުރިހާ ކުދިންވެސް ޝަރަހަތަކުގެ ނޯޓްސް ނަގަން ޖެހޭނެ ކަމާ، ކޮންމެ ވަގުތެއްގައި ވެސް ދަރިވަރުންގެ ޓާރން (ވަގުތު) ޖެހިދާނެކަމަށް ދަރިވަރުން ސަމާލު ކުރުވުން. |
|
ފިޝްބޮލް ޑިބޭޓް |
· މިގޮތަށް ހަރަކާތް ރާވާއިރު، 3 ކުދިންގެ ގުރޫޕް ހަދައި، އެކަކަށް ދޭނީ މައުޟޫޢާ އެއްކޮޅަށް ވާހަކަ ދައްކަންށެވެ. ދެވަނަ ކުއްޖާއަށް ދޭނީ މައުޟޫޢާ އިދިކޮޅަށް ވާހަކަ ދައްކަންށެވެ. 3 ވަނަ ދަރިވަރު ޖެހޭނީ ދެކޮޅުން ދައްކާ ވާހަކަ އަޑު އަހާފައި އެންމެ ރަގަޅަށް ގަބޫލުކުރެވޭ ހެއްކާއެކު ވާހަކަ ދެކެވުނު ކޮޅެއް ނިންމަންށެވެ. |
· މިފަދަ ހަރަކާތްތައް ރާވާއިރު ފިލާވަޅާއި ގުޅޭ، ދެކޮޅަށް ވާހަކަ ދެއްކޭފަދަ ހުޅުވާލެވިފައިވާ މައުޟޫޢު އިޚްތިޔާރު ކުރުން މުހިންމެވެ. ހަމައެހެންމެ ދަރިވަރުންނަށް އެކުދިންގެ ރޯލްތައް ވަރަށް ރަގަޅަށް ބުނެދެވިފައި އޮތުން ވެސް މުހިންމެވެ. |
|
ކޭސް ސްޓަޑީ |
· ދަރިވަރުން ބައިވެރިވެގެން މަސައްކަތް ކުރެވޭފަދަ ތަފާތު ކޭސް ސްޓަޑީ ދާއިރާތަކެއް ކަނޑައަޅާށެވެ. · ދަރިވަރުން 5 ނުވަތަ 4 ކުދިން ގުރޫޕްކޮށް މަސައްކަތް ރާވާށެވެ. · 15 ނުވަތަ އެއަށް ވުރެ ގިނަ ވަގުތު ވިޔަސް ހަވާލު ކުރެވުނު ކޭސް ރަގަޅަށް ރިވިއުކޮށް މަސައްކަތް ކުރާނެ ވަގުތު ހަމަޖައްސާށެވެ. · އެކި ގުރޫޕްތަކުގައި ވާހަކަ ދެކެވެމުން ދާއިރު މުދައްރިސް ޒިޔާރަތްކޮށް ސުވާލު ކޮށް ހެދުން · މަސައްކަތުގެ ވަގުތު ހަމަވުމުން ގުރޫޕްގެ ދަރިވަރުންގެ ކޭސް އެނަލިސިސް ހުށަހަޅަން ބުނުން |
· މިފަދަ ހަރަކާތް ރާވާއިރު އެންމެ ބޮޑަށް ސަމާލުކަން ދޭން ޖެހެނީ ދަރިވަރުންނަށް ފިލާވަޅާ ގުޅޭ ރަގަޅު ކޭސްތައް ހަވާލު ކުރުމަށެވެ. ދެން ދަރިވަރުންގެ މެދުގައި މަސައްކަތް އެންމެން ބައިވެރިވެގެން ވާހަކަ ދައްކާތޯ، އެނަލިސިސް/ތަހުލީލު ކުރުމަށް ގެންގުޅޭ އުކުޅުތަކަކީ ކޮބައިތޯ ބަލައި ވާހަކަ ދައްކާ ރަގަޅު އުކުޅުތައް ބޭނުން ކުރުމަށް އެހީތެރިވެދިނުން ހިމެނެއެވެ. |
|
ޓީމް-ބޭސްޑް-ލާރނިން |
· މިގޮތަށް އުނގެނުން ރާވާއިރު، ދަރިވަރުންނަށް މާއްދާގެ ކިޔަވައި ނުދޭ ބައެއް ހަވާލުކޮށް މިސާލަކަށް ކިޔަން ޖެހޭ ރީޑިން/ކިއުން ދީ އެކުދިން އަމިއްލަ އަށް އެކިޔައި ހަދަން ޖެހޭ ކުއިޒެއް ހަވާލު ކުރާށެވެ. އެއަށްފަހު އެކި ކުދިން އެކި ގުރޫޕަށް ހަމަޖައްސާ ގުރޫޕް ކުދިންގެ މެދުގައިވެސް އެކުއިޒުގެ ސުވާލުތައް، ނޭނގޭ ސުވާލުތަކުގެ ޖަވާބުތައް ރިވިއުކޮށް ހުރިހާ އެންމެނަށް ގަބޫލު ކުރެވޭ ރަގަޅު ޖަވާބު ހުށަހެޅުމަށް ފުރުސަތު ދޭނީއެވެ. ޖަވާބާއެކު އެ ޖަވާބު ރަގަޅުވީ ކީއްވެކަން ދަރިވަރުންނަށް ބުނެދޭން އެނގެން ޖެހޭނެއެވެ. · ފުރަތަމަ ވަކި ވަކި ކުދިން ހެދިއިރުގެ ސްކޯރ އާއި އަދި ގުރޫޕް ކުދިން ބައިވެރިވެގެން ހެދިއިރު ގެ ލިބުނު ސްކޯރތައް ނޯޓްކުރުން މުހިންމެވެ. · ދަރިވަރުންނަށް އޮޅުން އަރާ ބައިތައް މުދައްރިސް އިތުރަށް ޝަރަހަ ކުރުން ވެސް ހިމެނެއެވެ. · އެއަށްފަހު އެމައުޟޫޢާ ގުޅޭ ބޮޑު ގުރޫޕް މަސައްކަތެއް ދިނުން. މިފަދަ ޓާސްކް ވާނީ ބޮޑަށް ޕްރޮބްލެމަކަށް (މައްސަލައަކަށް) އަމާޒު ކުރެވޭ ޓާސްކަކަށެވެ. |
· މިފަދަ ހަރަކާތް ގެންދާއިރު، ރީޑިއެއް ހަވާލު ކުރެވޭނަމަ ސީދާ ޓެކްސްޓްފޮތުން ރީޑިންއެއް ނަގާފައި ދިނުމަށްވުރެ އެފިލާވަޅާއި ގުޅޭ އެހެން ރިސޯސްއަކުން ރީޑިން އިޚްތިޔާރު ކުރުން ރަގަޅެވެ. އަދި ހަމައެހެންމެ އެކްޓިވް ރީޑިން ހުނަރުތަކަށް ދަރިވަރުންނަށް އިރުޝާދު ދިނުން ވެސް މުހިންމެވެ. މިސާލަކަށް މާރޖިންގައި ނުވަތަ ކިޔަމުންދާ ޕޮއިންޓްތައް ނޯޓްކުރަމުންދާ ބުނުން، އަދި ހައިލައިޓްކުރަމުންދާ އިރުޝާދު ދިނުންފަދަ ކަންތައްތައް ވެސް ހިމެނެއެވެ. މީގެ އިތުރުން ދަރިވަރުން ގުރޫޕްތެރޭގައި މަޝްވަރާ ކުރާއިރު އަޑު މެނޭޖުކުރުމާއި އެއްކުއްޖަކު އަނެއްކުއްޖަކު ވާހަކަ ދައްކާއިރު އަޑު އެހުމަށް ބާރު އެޅުން ހިމެނެއެވެ. |
މިއަދު މި ހުށަހަޅާލެވުނީ ވެސް ކިޔަވައިދިނުމުގެ ދާއިރާގައި މުދައްރިސުންނަށް ބޭނުންތެރި ވާހަކަ ކޮޅެކެވެ. ކިޔަވައިދިނުމަކީ ދަރިވަރުންގެ ހުނަރުތަކެއް ތަރައްގީކޮށް ކުރިއަރުވަން ކުރާ މަސައްކަތެކެވެ. މުދައްރިސުންގެ ކިޔަވައިދިނުން މިފަދަ ގޮތްތަކަށް އަމާޒު ނުކުރެވޭނެމަ ކިޔަވައިދިނުމުގެ ފުރިހަމަ ޒިންމާ އަދާ ކުރެވޭ ކަމަށް ގަބޫލުކުރެއްވުން ރަގަޅެއް ނޫނެވެ. މަޢުލޫމާތުތަކެއް ދަރިވަރުންނަށް ހަމައެކަނި ކިޔަވައިދިނުމުގެ ބަދަލުގައި އެކުދިން ސްކޫލު ނިމިގެންދާއިރު ތަމުރީނުދެވިފައިވާ ރަގަޅު ހުނަރުތަކެއް ހުރުމަކީ ވެސް އަޅުގަނޑުމެންގެ ހުރިހާ މުދައްރިސުންގެ ޒިންމާއެކެވެ. އެންމެ ކުރުކޮށް ދަންނަވާނަމަ އެއީ ގައުމީ ޒިންމާއެއްވެސް މެއެވެ. ޖީލުތައް ބިނާކުރަނީ މުދައްރިސުންނެވެ. އެމީހުންގެ ހުނަރުތައް ނެތީމަ އިނގިލި އެންމެ އަވަހަށް ދިއްކުރެވެނީ ވެސް ތަޢުލީމީ ދާއިރާއަށެވެ. މިއީ އަޅުގަޑުމެން ވިސްނާލުން ރަގަޅު ކަމެކެވެ. އަޅުގަޑުމެން އަދާކުރަން ޖެހޭ ޒިންމާ އަދާ ކުރެވެނީ ކިހާވަރަކަށްތޯ އަމިއްލައަށް ސުވާލު އުފައްދާ ރިވެލި ކުރުމަކީ މިފަދަ ކިޔަވައިދިނުމުގެ ގޮތްތައް ބޭނުން ކުރުމުގެ މުހިންމު ކަން ޚިޔާލުކޮށްލެވޭނެ ކަމެކެވެ. ކޮންމެ މުދައްރިސަކީވެސް މިޒިންމާގައި އެއްވަރަކަށް ހިއްސާވާ ފަރާތްތަކެވެ. ދަރިވަރުންނަކީ ހަރުދަނާ ހުނަރުވެރި ޖީލަކަށް ހެދުމުގެ ޒިންމާއަކީ ވަކި މުދައްރިސަކަށް ޚާއްޞަވެފައި އޮންނަ މަސްއޫލިއްޔަތެއް ނޫނެވެ. ދަރިވަރުންގެ ކިބައިގައި ހަރުލެއްވުން މުހިންމު ހުނަރުތަކަށް ދުނިޔޭގެ ކުރިއަރާފައިވާ ގައުމުތަކުގައި ދިރާސާތައް ހަދާ މިފަދަ ހުނަރުތަކަށް ރިޢާޔަތްކޮށް މުޅި ސްކޫލުސިސްޓަމް ދަނީ ބައްޓަން ކުރަމުންނެވެ. އަޅުގަޑުމެންގެ މުޖުތަމަޢުގައި މިފަދަ މުއުޟޫޢުތަކަށް ވާހަކަދެކެވޭ މިންވަރު މަދުވުމުގެ އިތުރުން ތަޢުލީމީ ދާއިރާގައި މިފަދަ ކަންކަމަށް އިރުޝާދުތައް ދެވޭ މިންވަރުވެސް މަދެވެ. ކޮލެބޮރޭޓީވްކޮށް އުނގެނުން ފަދަ ގޮތްތައް ކިޔަވައިދިނުމުގައި ބޭނުންކުރުމަކީ ހުރިހާ މުދައްރިސުން ވެސް ކިޔަވައިދިނުމުގައި ޢާއްމުކޮށް ކުރެވޭ ކަމަކަށް ހަދައި އޭގެ ފައިދާތައް ދެނެގަނެ ހޯދާ ބަލާބަޔަކަށް ހުރިހާ މުދައްރިސުންވެސް ވުމުން އެކަމުގެ ހެޔޮ ބަދަލުތައް އަޅުގަނޑުމެންގެ ކުރިޔަށް އޮތް ޖީލުތަކުން ފެންނާނެކަން ކަށަވަރެވެ.