’ޑރ. ޝާފިޔާގެ ޢިލްމީ ވެހި‘ މި ވެއްސަކީ އަޅުގަނޑުގެ ދަރިވަރުންނާއި، މުދައްރިސުންނާއި އަދި އާންމުނާއި ހިސާބަށް އަޅުގަނޑުގެ ލިޔުންތައް ފޯރުކޮށްދިނުމަށް ފަރުމާކުރެވިފައިވާ މަންސައެކެވެ. މި ވެހީގެ މައިގަނޑު މަގުޞަދަކީ، އެކި ފޯރަމްތަކުގައި އަޅުގަނޑު ލިޔެފައިވާ ލިޔުންތައް ފަސޭހައިން އެއްތަނަކުން އެ ތަކެތި ބޭނުންވާ ފަރާތްތަކަށް ފޯރުކޮށްދިނުމެވެ. މިއީ އަޅުގަނޑުގެ ދަރިވަރުންނާއި، މުދައްރިސުންނާއި، އަދި ތަޢުލީމީ ދާއިރާގައި މަސައްކަތްކުރައްވާ ޚިދުމަތްތެރިންގެ އެދުމާއެކު ކުރެވިފައިވާ މަސައްކަތެކެވެ. ހަމައެއާއެކު ސްކޫލުތަކުގެ އިސްފަރާތްތަކެއް މިކަމަށް އެދިފައި ވުމަކީ ވެސް މި މަންސަ ވުޖޫދުވުމަށް މެދުވެރިކުރުވި އެއް ސަބަބެވެ.
މި ޢިލްމީ ވެށީގައި ތަފާތު ދާއިރާތަކުން ލިޔުންތައް ޝާއިޢުކުރަމުންދާނަމެވެ. ޚާއްޞަކޮށް ކިޔަވައިދިނުމާއި، ޑިޖިޓަލް ޓެކްނޮލޮޖީ އުނގެނުމާއި އުނގަންނައިދިނުމުގައި ބޭނުންކުރުމާއި، ދިރާސީ ބައެއް މަސައްކަތްތަކާއި ބެހޭ ލިޔުންތައް ވެސް މި މަންސައިގައި ޝާއިޢު ކުރާނަމެވެ. މީގެ އިތުރުން ތަފާތު ކޮލަމުތަކުގައި ކުރިން ލިޔެވިފައިވާ ލިޔުންތަކާއި، މިހާރުވެސް ލިޔެވެމުންދާ ލިޔުންތައް މި މަންސައިގައި އެއްތަން ކުރާނަމެވެ. ތަފާތު މައުޟޫޢުތަކާއި ގުޅޭ އެކި ލިޔުންތައް އިތުރުވަމުންދާ މިންވަރަކުން ފޮތެއްގެ ސިފައިގައި ބައެއް ލިޔުންތައް ޝާއިޢުކުރުމަކީ އަޅުގަނޑު ވިސްނާފައިވާ ގޮތެވެ. މިކަމަކީ އިޖުތިމާޢީ ޒިންމާގެ ދަށުން ކުރެވޭ ކަމަކަށްވާތީ މި މަންސައަކީ ޖުމުލަގޮތެއްގައި ހުރިހާ އެންމެނަށް ވެސް ހިލޭ ’އެކްސެސް‘ ލިބިދޭ މަންސައެކެވެ. މި މަންސައިގައި ލިޔެވޭ ކޮންމެ ލިޔުމަކާ ގުޅޭ ގޮތުން ވެސް ކިޔުންތެރިންގެ ކޮމެންޓް އަދި ޚިޔާލުތަކަކީ މީގައި ހިމަނާ ލިޔުންތަކުގެ ފެންވަރު ރަނގަޅުކޮށް އިތުރަށް ހަރުދަނާ ކުރުމަށް ލިބޭ ނުހަނު ބޮޑު ފުރުސަތެއް ކަމުގައި އަޅުގަނޑު ދެކެމެވެ.
ޑރ. ޝާފިޔާގެ ތަޢާރަފެއް
އަޅުގަޑަކީ ދިވެހިރާއްޖޭގެ ޤައުމީ ޔުނިވަރސިޓީގައި އެސިސްޓެންޓް ޕްރޮފެސަރގެ މަގާމުގައި މަސައްކަތް ކުރާ ދާރިސެކެވެ. އަޅުގަނޑުގެ ވަޒީފާގެ މައިގަނޑު ދާއިރާތަކަކީ މުދައްރިސުން ތަމުރީނުކުރުމާއި، މާސްޓާރސް އަދި ޕީއެޗްޑީ ފެންވަރަށް ކިޔަވާ ދަރިވަރުންގެ ދިރާސީ މަސައްކަތުގައި އެހީތެރިވެދިނުމާއި ތަފާތު ދިރާސީ މަސައްކަތްތަކުގައި އިސްރޯލެއް އަދާކުރުމެވެ.
އަޅުގަނޑު ޕި.އެޗް.ޑީ ޙާޞިލުކުރީ ނިއުޒިލޭންޑްގެ ޔުނިވަރސިޓީ އޮފް ވައިކަޓޯއިންނެވެ. އަޅުގަނޑުގެ ޢިލްމީ ކަރުދާސްތައް ވަރަށް ގިނަ ބައިނަލް އަޤްވާމީ ޖާރނަލްތަކުގައި އިނގިރޭސި ބަހުން ޝާއިޢު ކޮށްފައިވާނެއެވެ. މިގޮތުން ޝާއިޢުކުރެވިފައިވާ އިނގިރޭސި ބަހުން ލިޔެވިފައިވާ ބައެއް ލިޔުންތައް ދެވިފައިވާ ލިންކް https://shorturl.at/ceuRY ލިބިވަޑައިގަންނަވާނެއެވެ. މި ލިންކްގައި ނުހިމެނޭ ބައެއް ލިޔުންތައްވެސް ބައެއް ޖާރނަލްތަކުގައި ޝާއިޢު ކުރެވިފައިވާނެއެވެ. އޭގެ އިތުރުން މިހާރު ވެސް އަޅުގަނޑަކީ ޢިލްމީ ޖާރނަލްތަކަށް ލިޔެ އަދި ތަފާތު ޖާރނަލްތަކުގެ ލިޔުންތައް ރިވިއު/ވަޒަން ކޮށް ދުނިޔޭގެ ފެންވަރުގައި ވެސް ޢިލުމީ މަސައްކަތްތަކުގައި ބައިވެރިވާ ފަރާތަކީމެވެ.
ދިވެހިރާއްޖޭގެ ޤައުމީ ޔުނިވަރސިޓީގެ ވަޒީފާގެ އިތުރުން ބައިނަލް އަޤްވާމީ ފެންވަރުގެ ބައެއް ފޯރަމްތަކުގައި ދިވެހިރާއްޖެ ތަމުސީލުކުރުމާއި، ޔޫއެންޑީޕީ ފަދަ މުއައްސަސާތަކުގެ މަސައްކަތްތަކުގައި ދަރުމަވެރި އެހީތެރިކަން ފޯރުކޮށްދިނުމަކީ އަމިއްލަގޮތުން އަޅުގަނޑު މުޖުތަމަޢަށް ކޮށްދޭ ޚިދުމަތްތަކެވެ. މީގެ އިތުރުން އަޅުގަނޑަކީ ރޭޑިއޯ/ޓީވީ ޕްރޮގްރާމްތަކާއި ނޫސް/މަޖައްލާ ފަދަ އެކި ދާއިރާތަކުގެ ޢިލްމީ މުހާވަރާތަކުގައި ޚިދުމަތް ފޯރުކޮށްދީ އެކަން ކަމަށް ޚާއްޞަ ޝައުޤުވެރިކަމެއް އޮންނަ ފަރާތެކެވެ. އަޅުގަނޑުގެ އެންމެ އިސް ޒިންމާއަކީ ގައުމު އަޅުގަނޑަށް ފޯރުކޮށްދިން ޢިލުމާއި ހުނަރު އެ ގައުމުގެ މުސްތަޤުބަލު ބިނާކުރުމަށް އަޅުގަނޑުގެ ހިއްސާ ދެވެން އޮތް އެންމެ ބޮޑު މިންވަރަކަށް ދިނުމެވެ. ކުރުކޮށް ބަޔާން ކުރާނަމަ، އަޅުގަނޑަށް ގައުމު ދިން އަގުހުރި އެއްޗެތި ގައުމުގެ މުސްތަގްބަލަށް ޓަކައި ދެމެހެއްޓެނިވި ގޮތަކަށް އިޢާދަކުރުމެވެ. އަޅުގަނޑު ގަބޫލު ކުރާގޮތުގައި، ޢިލްމުގެ އަގު ކުރެވޭނީ އެ ޢިލްމެއް ފެތުރުނު މިންވަރަކުންނެވެ. ޖުމުލަގޮތެއްގައި އަޅުގަނޑަކީ އުނގެނުމާއި އުނގަންނައިދިނުމުގެ ދާއިރާއަށް ޚާއްޞަ ލޯތްބެއް އޮންނަ ޢިލްމު ފަތުރާ ފަރާތެކެވެ.